Azərbaycan Respublikasının 2024-cü il 7 noyabr tarixli 67-VIIQD nömrəli Qanunu ilə Mülki Prosessual Məcəlləyə dəyişiklik edilərək aşağıdakılarla bağlı prosessual müddətlər müəyyən edilib.

Müvəqqəti təminat tədbirlərinin tətbiqi, habelə arbitraj məhkəmələrinin müvəqqəti təminat tədbirlərinin tətbiqi barədə qərarlarının tanınması və icrası ilə bağlı ərizələrə ərizənin daxil olduğu vaxtdan sonrakı iş günündən gec olmayaraq baxılır (67-1.5-ci, 159.1-ci və 493.1-ci maddələr).

Müvəqqəti təminat tədbirinin bir növünün digəri ilə əvəz edilməsi məsələsi bu barədə ərizə məhkəməyə daxil olduğu vaxtdan 10 gün müddətində məhkəmə iclasında həll edilir, müvəqqəti təminat tədbirinin ləğv olunması barədə ərizəyə isə məhkəməyə daxil olduğu vaxtdan 20 gün müddətində baxılır və həll edilir (161.3-cü və 162.2-ci maddələr).

İşə baxılması ilə əlaqədar olan məsələlərə dair işdə iştirak edən şəxslərin vəsatətinə onun təqdim edildiyi və ya növbəti məhkəmə iclasından gec olmayaraq baxılır. Vəsatətdə göstərilən məsələ təxirəsalınmaz qaydada həll edilməli olduqda, vəsatətə baxılması ilə bağlı işdə iştirak edən şəxslərə məlumat verilməklə məhkəmə iclası təyin edilə bilər             (184.4-cü maddə).

Qətnamədə və ya qərardadda buraxılmış yanlışlıqların və açıq hesab səhvlərinin düzəldilməsi barədə işdə iştirak edən şəxslərin ərizəsinə məhkəməyə daxil olduğu vaxtdan 10 gün müddətində baxılır və həll edilir (228.2-ci maddə).

Əlavə qətnamə və ya əlavə qərardad ərizə məhkəməyə daxil olduğu vaxtdan 20 gün müddətində qəbul olunur (229.2-ci maddəsi).

Qətnamənin və ya qərardadın izah edilməsi məsələsi bu barədə ərizə məhkəməyə daxil olduğu vaxtdan 20 gün müddətində məhkəmə iclasında həll olunur (230.4-cü maddə).