Hüquqi Ekspertiza və Qanunvericilik Təşəbbüsləri Mərkəzinin nümayəndələri “Azərbaycan Respublikasının mədəni mülkiyyətinin qanunsuz dövriyyəsi” mövzusunda keçirilən dəyirmi masada iştirak edib

28 fevral 2025 | 16:48 196

Cari ilin 27 fevral tarixində Hüquqi Ekspertiza və Qanunvericilik Təşəbbüsləri Mərkəzinin İcraçı direktoru Samir Mahmudov, Qanunvericilik təşəbbüsləri və monitorinq şöbəsinin müdiri Nurani Rüstəmli, həmin şöbənin aparıcı mütəxəssisi Əsmər Məmmədzadə Azərbaycan Milli İncəsənət Muzeyində “Azərbaycan Respublikasının mədəni mülkiyyətinin qanunsuz dövriyyəsi” mövzusunda aidiyyəti dövlət qurumları, ali təhsil müəssisələri, akademik dairələr və mütəxəssislərin iştirakı ilə keçirilən dəyirmi masada iştirak ediblər.

Tədbiri açılış nitqi ilə açan mədəniyyət naziri Adil Kərimli dəyirmi masanın əsas məqsədinin mədəni mülkiyyətin qorunmasına cavabdeh qurumlar arasında koordinasiya üçün formatın müəyyən edilməsi olduğunu bildirib. Bu sahədə dövlət nəzarəti və tənzimlənməsini təmin etmək məqsədilə görülən tədbirlərdən danışıb.

Daha sonra “Mədəni mülkiyyətin qanunsuz dövriyyəsi ilə mübarizədə gömrük orqanlarının rolu”, “Mədəni irsimizin qorunması: 1954 və 1970-ci il konvensiyaları üzrə fəaliyyət”, “Türkiyənin mədəni mirasının qorunmasına və mədəni irs qaçaqmalçılığı ilə mübarizəyə dair siyasəti”, “Mədəni mülkiyyətin qanunsuz dövriyyəsi: beynəlxalq hüquqi çərçivə” mövzularda çıxışlar edilib, müvafiq sahədə aparılan işlər barədə məlumat verilib.

Həmçinin, çıxışlarda mədəni mülkiyyətin qorunmasında müasir yanaşmalar və çağırışlar, mədəni irsin qanunsuz dövriyyəsi ilə mübarizə sahəsində həyata keçirilən tədbirlər, o cümlədən geniş maarifləndirmə işi və digər məsələlər üzrə fəaliyyətin davam etdirilməsinin zəruriliyi vurğulanıb, geniş fikir mübadiləsi aparılıb.