Cari ilin 5 mart tarixində “Azərbaycan Respublikası Mülki Məcəlləsinin təkmilləşdirilməsi” işçi qrupun video-konfrans formatında hesabat iclası baş tutub.

İclasda işçi qrupun rəhbərliyi və üzvləri iştirak edib.

İclası giriş sözü ilə açan işçi qrupun rəhbəri, Hüquqi Ekspertiza və Qanunvericilik Təşəbbüsləri Mərkəzinin (HEQT Mərkəzi) İcraçı direktoru Samir Mahmudov 2024-cü il üzrə işçi qrupun Fəaliyyət Planında nəzərdə tutulmuş tədbirlərlə bağlı görülən işlər barədə məlumat verib.

İclasın gedişatında 2025-ci il üçün Fəaliyyət Planı iclas iştirakçılarına təqdim edilib, sənədlə əlaqədar iştirakçıların təklifləri müzakirə edilib və sualları cavablandırılıb.

Sonda işçi qrupun rəhbəri Samir Mahmudov əsaslandırılmış təklif və rəylərin işçi qrupun fəaliyyəti üçün əhəmiyyətini bir daha vurğulayaraq bütün maraqlı tərəfləri daha intensiv əməkdaşlığa dəvət edib.

Xatırladırıq ki, “Azərbaycan Respublikası Mülki Məcəlləsinin təkmilləşdirilməsi” işçi qrupu 2023-cü ilin dekabr ayında HEQT Mərkəzinin təşəbbüsü əsasında Azərbaycan Respublikası Biznes Mühiti və Beynəlxalq Reytinqlər üzrə Komissiyasının tərkibində yaradılmışdır. İşçi qrup tərəfindən hazırlanmaqda olan Azərbaycan Respublikası Mülki Məcəlləsinin təkmilləşdirilməsi üzrə Konsepsiya sənədinin layihəsi ilə HEQT Mərkəzinin veb-saytı vasitəsilə tanış olmaq olar (Mülki Məcəllənin Konsepsiyası).