Cari ilin 12 mart tarixində “Azərbaycan Respublikası Mülki Məcəlləsinin təkmilləşdirilməsi” işçi qrupunun tərtibat komandasının kiçik tərkibdə iclası keçirilib.

İclasda Mülki Məcəllənin 4-cü fəslinin (Hüquqi şəxslər) təkmilləşdirilməsi ilə bağlı GIZ – Almaniya Beynəlxalq Əməkdaşlıq Cəmiyyəti təşkilatının dəstəyi ilə hazırlanan layihə, o cümlədən həmin layihənin tarixçəsi və təfərrüatları ilə bağlı müzakirə aparılıb. Eyni zamanda, layihənin hazırlanma mərhələsi, tətbiq olunması üçün tələb olunan normativ-hüquqi baza və beynəlxalq təcrübəyə uyğunlaşdırılması aspektləri geniş təhlil edilib.

İclasda işçi qrupun rəhbəri, Hüquqi Ekspertiza və Qanunvericilik Təşəbbüsləri Mərkəzinin (HEQT Mərkəzi) İcraçı direktoru Samir Mahmudov, Azərbaycan Respublikası Vəkillər Kollegiyasının Rəyasət Heyətinin üzvü, “Roedl ənd Partner” MMC-nin kənar idarəçisi Elçin Usub, Bakı Dövlət Universitetinin Mülki hüquq kafedrasının dosenti, hüquq üzrə fəlsəfə doktoru Sərvər Süleymanlı, “Əkrəm Həsənov və Partnyorları Vəkil Bürosu”nun müdiri, vəkil Əkrəm Həsənov və işçi qrupun digər üzvləri iştirak edib.

Məlumat üçün bildirək ki, Mülki Məcəllənin təkmilləşdirilməsi işçi qrupunun 2025-ci il üzrə Fəaliyyət Planında Məcəllənin 4-cü fəslinin (Hüquqi şəxslər) təkmiləşdirilməsi nəzərdə tutulub. İşçi qrup tərəfindən sözügedən fəslin həmin layihə əsasında təkmilləşdirilməsi planlaşdırılır.